——————–
তৰা অ’ তৰা তুমি আকাশত থাকা
জোনবাইৰ লগত কিনো মনৰ কথা পাতা ?
জোনবায়ে কয় নে বাৰু তোমাক তাইৰ যত লেঠা,
পৃথিৱীৰ যে তাই একমাত্ৰ উপগ্ৰহ এইবোৰ কথা ?
প্ৰতি দিনে যে তাই একলাকৈ বাঢ়ে ,
পোন্ধৰ দিনৰ মূৰে মূৰে এক পক্ষ বোলে !
কেতিয়াবা নাওখন হৈ আকাশত ভাঁহে ,
আইতাই তাকে দেখি কাঁচিজোন বোলে ।
দিনে দিনে বাঢ়ি বাঢ়ি কাঁহী এখন হয়,
সোলা হাঁহিৰে আইতাই তাকে পূৰ্ণিমা বুলি কয় ।
তাৰ পাছত প্ৰতি দিনে একলাকৈ কমে,
পোন্ধৰ দিনৰ মূৰত দেখোন আমাক আন্ধাৰে ছানি ধৰে ।
এদিন ৰাতি মই ভয় খাই দিছিলোঁ কান্দি
মোৰ মৰমৰ জোনবাইজনীক কোনে কাজল সানিলে বুলি !
মায়ে ক’লে মিচিকিয়াই অ’ মোৰ পোনা ,
আজি যে অমাৱস্যা তুমি জানো নাজানা ?
নকৰিবা ভয় পোনা নকৰিবা ভয় ।
এইটো পক্ষকেই কৃষ্ণ বুলি কয় ।
কৃষ্ণ মানে ক’লা জানি বুজি ল’বা ,
তেতিয়াহে লগৰীয়াক শিকাব পাৰিবা ।
আৰু এটা পক্ষ আছে কৃষ্ণৰ ওলোটা ,
শুক্ল পক্ষ তাৰ নাম আজিয়েই শিকি ল’বা ।
শুক্ল মানে শুকুলা, তাৰ অৰ্থ বগা ,
জোন -তৰাৰ কথা আৰু অনেক জানিবলৈ পাবা ।
****